KEGOC АЭБУ-мен кадр даярлау бағытында ынтымақтастығын кеңейтуде

«KEGOC» АҚ басқарушы директоры Төлеген Сафуани бастаған делегация Ғұмарбек Дәукеев атындағы Алматы энергетика және байланыс университетіне (АУБУ) барды. Сапар барысында компания өкілдері АЭБУ-дің Біліктілікті арттыру орталығының мүмкіндіктерімен және Energo University-дің заманауи зертханаларымен танысты. Бұл жерде энергетика, автоматтандыру және ІТ бағыттары бойынша тәжірибелік сабақтар өткізіледі.

Биыл KEGOC-тың шамамен 70 қызметкері аталған оқу бағдарламасынан өтетіні жөнінде келісім жасалды. Алдағы уақытта бағдарлама аясын кеңейту жоспарланып отыр, бұл өз кезегінде АЭБУ-мен серіктестіктің жаңа кезеңіне жол ашады.

Сонымен қатар университет ректоры Ғани Нығыметовпен кездесу өтіп, онда алдағы ынтымақтастықтың болашағы мен бірлескен білім беру жобаларын жүзеге асыру мәселелері талқыланды. KEGOC үшін елдің жетекші оқу орындарымен серіктестік жүргізу — энергетика саласындағы заманауи сын-қатерлерге жауап бере алатын білікті мамандарды даярлап, кадрлық әлеуетті нығайту жолындағы маңызды қадам.